"ექვთიმეს გადარჩენილს თვითმარქვია ექვთიმე ანგრევს" - აქცია მუზეუმის გადასარჩენად

"ჩადექი ცოცხალ ჯაჭვში მუზეუმის გადასარჩენად!" - 5 აგვისტოს, 12:00 საათზე აქცია ჩაინიშნა. მოქალაქეები შალვა ამირანაშვილის სახელობის ხელოვნების მუზეუმთან შეიკრიბებიან.

აქციის ორგანიზატორები "თავისუფლების ინსტიტუტი" და "ამომრჩეველთა განათლების საზოგადოებაა".

"ექვთიმეს გადარჩენილს თვითმარქვია ექვთიმე ანგრევს. გუშინ საყდრისი. დღეს ხელოვნების მუზეუმი. რა იქნება ხვალ? ეროვნულ მემკვიდრეობას თუ ვერ დავიცავთ, შთამომავლობა არ გვაპატიებს", - წერენ ორგანიზატორები. 

ცნობისთვის, 4 ივლისს კულტურის მინისტრმა, თეა წულუკიანმა განცხადება გაავრცელა და თქვა, რომ შალვა ამირანაშვილის ხელოვნების სახელმწიფო მუზეუმი მართვის განსაკუთრებულ რეჟიმზე გადადის. სამინისტრო ამბობს, რომ:

• ლ. გუდიაშვილის ქუჩის გასწვრივ მდებარე შენობის ფლიგელის გამაგრება დაკავშირებული იქნება ძალიან დიდ ტექნიკურ სირთულეებთან და დანახარჯებთან და მისი გაძლიერება სავარაუდოდ არ იქნება რენტაბელური;
• ალ. პუშკინის ქუჩის გასწვრივ მდებარე ფლიგელზე განვითარებულია მზიდი კონსტრუქციების დიდი გადახრები, დეფორმაციები და რღვევები, რის გამოც შეუძლებელია შენობის ამ ნაწილის შენარჩუნება და გაძლიერება;
• შენობის მხოლოდ ცენტრალური შესასვლელის გაძლიერება არის შესაძლებელი;
• შენობის ქვეშ მიმდინარეობს ფუძე-გრუნტების გაწყლოვანება ტექნოგენური და ატმოსფერული წყლების ჩამოდინებისაგან და შენობას არც სართულშუა გადახურვის და არც სახურავის დონეებზე არ გააჩნია ანტისეისმური სარტყლები, რის გამოც ის არ აკმაყოფილებს სეისმურობის ელემენტარულ სტანდარტებს.

სამინისტროს სურს, რომ მუზეუმის ძირითადი შენობა დაიცალოს. მუზეუმში ჩვენი ქვეყნის სამუზეუმო ფასეულობათა 80 პროცენტზე მეტია თავმოყრილი.