დონბასელი სეპარატისტების ლიდერმა მარიუპოლში ადმინისტრაციის შექმნა გადაწყვიტა. ინფორმაციას რუსული მედია ავრცელებს.
"გადავწყვიტე, შევქმნა დონეცკის სახალხო რესპუბლიკის ადგილობრივი ადმინისტრაცია - ქალაქ მარიუპოლის ადმინისტრაცია" - ნათქვამია დენის პუშილინის განკარგულებაში.
ის ასევე წერს, რომ მარიუპოლის ადმინისტრაცია იქმნება იმისთვის, რომ უზრუნველყოს კანონი, წესრიგი და ნორმალური ცხოვრება.
უკვე ცნობილია, რომ მარიუპოლის ადმინისტრაციის ხელმძღვანელს დაევალა შეიმუშაოს დებულება ახალი სამთავრობო ორგანოს, მისი სტრუქტურისა და აპარატის შესახებ და უზრუნველყოს ადმინისტრაციის სახელმწიფო რეგისტრაცია.
