დიდი ბრიტანეთის პრემიერმინისტრის, ბორის ჯონსონის განცხადებით, კიევზე რუსეთის თავდასხმის მოგერიებით, უკრაინელებმა "21-ე საუკუნის ყველაზე დიდ წარმატებას მიაღწიეს".
უკრაინაში ომთან დაკავშირებით ჯონსონმა თემთა პალატაში სიტყვით გამოსვლისას ისაუბრა.
"ჩვენი უკრაინელი მეგობრები იბრძვიან თავიანთი ერისთვის", - თქვა მან და აღნიშნა, რომ ის უკრაინელი ხალხის გმირობითა და გამბედაობით აღტაცებულია.
მისივე თქმით, ბრიტანეთმა და მისმა მოკავშირეებმა გარკვეული იარაღი მიაწოდეს უკრაინას, მაგრამ "დედაქალაქი, უკრაინულმა მამაცობამ და თავგანწირვამ გადაარჩინა".
