დღეიდან ოფიციალურად ამოქმედდა ევროკავშირის გადაწყვეტილება, რომლის მიხედვითაც, სრულად შეჩერებულია რუსეთთან გამარტივებული სავიზო რეჟიმი. გადაწყვეტილება ევროკავშირის საბჭომ 9 სექტემბერს მიიღო და სწორედ 12 სექტემბრიდან შევიდა ძალაში.
შესაბამისად, ამიერიდან სავიზო კოდექსის ზოგადი წესები რუსეთის ფედერაციის მოქალაქეებზეც გავრცელდება.
ევროკავშირის ეს გადაწყვეტილება რუსეთის ფედერაციის მოქალაქეებისთვის ნიშნავს:
- ვიზის მოსაკრებლის გაზრდა 35-დან 80 ევრომდე,
- დამატებითი დოკუმენტური მტკიცებულებების მიწოდების საჭიროება,
- ვიზის დამუშავების დროის გაზრდა,
- მრავალჯერადი ვიზების გაცემის წესების გამკაცრება.
