სეიფის გადატანა ვერ მოვახერხე, გადავწყვიტე დამეტოვებინა საველე ზურგჩანთაში და დილით დავაბრუნებდი - ნიკა ვანიშვილი "ადამის კბილზე"

კულტურის სამინისტროს მიერ გადამალული კბილი სავარაუდოდ პროკურატურაში ინახება. საქმეზე დაწყებულია სისხლის სამართლის გამოძიება. 

წულუკიანის უწყების გენინსპექციამ მოპოვებული არქეოლოგიური მასალა ერთ-ერთი მეცნიერის საცხოვრებელი სახლიდან ამოიღო და ამტკიცებს, რომ შენახვის ადგილი და პირობები ეროვნულ მუზეუმთან შეთანხმებული არ ყოფილა.

თავად პალეონტოლოგი ნიკა ვანიშვილი ამბობს, რომ კბილი განსაკუთრებით დაცულ გარემოში უნდა განთავსებულიყო, სეიფის გადატანა ვერ მოახერხა და  გადაწყვიტა, ერთი ღამით არტეფაქტი საველე ზურგჩანთაში დაეტოვებინა, დილით კი ისევ პალეონტოლოგიის ინსტიტუტში დააბრუნებდა.

მისივე თქმით, მან თავად უთხრა მუზეუმის ხელმძღვანელს, ნიკოლოზ ახალბედაშვილს, რომ კბილი მის საცხოვრებელ სახლში ინახებოდა  და სწორედ ამის შემდეგ მივიდა გენინსპეცია მის სახლში. 

"კბილი უნდა განთავსებულიყო განსაკუთრებით დაცულ გარემოში სეიფში, მაგრამ სამწუხაროდ იქიდან გამომდინარე, რომ მე მარტო ვიყავი ერთადერთი თანამშრომელი პალეონტოლოგიის ინსტიტუტის შენობაში, სეიფის გადატანა ისეთ ოთახში, რომელიც უფრო მყარი იყო ვერ მოვახერხე, სეიფის სიმძიმიდან გამომდინარე. გადავწყვიტე, რომ ფორსმაჟორულ სიტუაციაში ეს კბილი ერთი ღამით, 19 სექტემბრის საღამოდან 20 სექტემბრის დილამდე დამეტოვებინა ჩემს საველე ზურგჩანთაში, შესაბამის ჯიბეში, სადაც ჩემი მეთვალყურეობის ქვეშ იქნებოდა მთელი ღამის განმავლობაში და დავაბრუნებდი პალეონტოლოგიის  ინსტიტუტში დილით, მოვათავსებდი სხვა კოლეგების დახმარებით ამ სეიფს უსაფრთხო ადგილას და ჩავკეტავდით იმ სეიფში და იქნებოდა უსაფრთხოდ კბილი" - ამბობს ნიკა ვანიშვილი. 

გამოძიების გამო, სავარაუდოა, რომ 24 სექტემბერს, შაბათს, საერთაშორისო გამოფენაზე ეს კბილი წარმოდგენილი არ იქნება.

იხილეთ ასევე:

• "გენინსპექციამ ის ამოიღო კერძო პირის ბინიდან და არის იქ, სადაც უნდა იყოს" | წულუკიანის პასუხი, სად არის "ადამის კბილი"
• ოროზმანში აღმოჩენილ კბილს თანამშრომელი სახლში, ტანსაცმლის კარადაში, ჩანთაში ინახავდა - მუზეუმი
• "ადამის კბილი" გამქრალია | მნიშვნელოვანი აღმოჩენა მეცნიერებს წულუკიანის უწყების გენინსპექციამ ჩამოართვა