უკრაინის პრეზიდენტის ადმინისტრაციის მრჩევლის, მიხაილო პოდოლიაკის თქმით, საქართველოს ხელისუფლებასთან მოლაპარაკება შეუძლებელია, რადგან "ისინი სხვა რეალობაში არიან".
ამის შესახებ პოდოლიაკმა უკრაინელ ჟურნალისტ ვასილ გოლოვანოვთან ინტერვიუში განაცხადა. ინტერვიუს გამოცემა SOVA ავრცელებს. პოდოლიაკმა გადაცემაში საქართველო-უკრაინის ურთიერთობასა და მიხეილ სააკაშვილის პატიმრობაზე ისაუბრა.
მისი თქმით, 11-თვიანი ომის შემდეგ, საქართველოს მთავრობას დღესაც არ ესმის "რომელ მხარეს უნდა იყოს".
"საქართველოსადმი ძალიან მარტივი დამოკიდებულება მაქვს. არის ქართველი ხალხი, თუმცა, სამწუხაროდ, მათ ძალიან დიდი შეცდომა დაუშვეს, როცა ასეთი ხელისუფლება აირჩიეს. ხელისუფლება, რომელსაც ბატონი ივანიშვილის სახელი ჰქვია, რუსეთის ფედერაციას ფართოდ გახელილი ან ფართოდ დახუჭული თვალებით უყურებს და მისგან ელის ენერგეტიკასთან დაკავშირებული რაღაც პრობლემების გადაჭრას და არა 2008 წლის ომის გაგრძელებას, რაც საქართველოს ტერიტორიების ოკუპაციის გახანგრძლივებას გულისხმობს" - ამბობს პოდოლიაკი.
ზელენსკის წარმომადგენლის აზრით, საქართველოში უცნაური ვითარებაა, რადგან ხელისუფლება მხარს უჭერს პრორუსულ ღირებულებებს, თუმცა ამავდროულად სურს წვდომა ჰქონდეთ ევროპულ ბაზრებსა და ფულზე.
პოდოლიაკმა საქართველო უნგრეთს შეადარა, რომელსაც მისი სიტყვებით, სურს საკუთარი წესებით ცხოვრება რუსეთის ავტორიტარულ ღირებულებებთან ახლოს, მაგრამ ამავდროულად, სარგებლობს თავისუფალი და დემოკრატიული სამყაროს უპირატესობით.
ინტერვიუში პოდოლიაკმა ასევე ისაუბრა საქართველოს ხელისუფლების პოზიციაზე უკრაინისთვის იარაღის გადაცემასთან დაკავშირებით. მან აღნიშნა, რომ უამრავი პატარა ქვეყანაა, მათ შორის ბალტიის ქვეყნებიც, რომლებიც მზად არიან უკრაინას იარაღითაც დაეხმარონ.
"არის ისეთი ქვეყნები, როგორიც საქართველოა. და ეს ძალიან გასაკვირ ფაქტად ჩაიწერება ისტორიაში, რომ საქართველოს ხელისუფლებამ 2022-2023 წლებში, რომელსაც რუსული შოვინისტური ელიტა თავს 2008 წელს დაესხა, განაგრძობს უკრაინისადმი უპატივცემულობის გამოხატვას, ევროპის რუსული ექსპანსიონიზმის პროცესისგან გათავისუფლებისას. დაე ქართველებმა მომავალში ამით იცხოვრონ", - თქვა პოდოლიაკმა.
