ნიკა გვარამია "მთავარ აქცენტებში" ბაჩალიაშვილის საქმის ახალ დეტალებს გაასაჯაროებს
გამოქვეყნდა:
"მთავარი არხის" გენერალური დირექტორი ნიკა გვარამია გადაცემაში "მთავარი აქცენტები" 23 წლის პროგრამისტის, თამარ ბაჩალიაშვილის ბუნდოვან ვითარებაში დაღუპვის საქმის ახალ დეტალებს გაასაჯაროებს.
გადაცემა "მთავარი არხის" ეთერში დღეს, 6 აგვისტოს, 22:00 საათზე დაიწყება.
თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი შაბათს სახლიდან გავიდა და სათვალთვალო კამერებმა ბოლოს თეთრიწყაროს რაიონში დააფიქსირეს. 23 წლის თამარ ბაჩალიაშვილი თეთრიწყაროს ტყეში, საკუთარ მანქანაში გარდაცვლილი იპოვეს. ერთ-ერთი ვერსიით, მისი გაუჩინარება ქალის
სამსახურეობრივ საქმიანობას უკავშირდება.
მისი ერთ-ერთი დამსაქმებელი კომპანია ZAG-ის მფლობელის, აბრაჰამ რეირბახის თქმით, თამარ ბაჩალიაშვილი სამსახურიდან წასვლას აპირებდა. მისმა ოჯახმა კი დაზუსტებით არ იცის, რას აკეთებდა 23 წლის პროგრამისტი თავის სამსახურში.
25 ივლისს, პროკურატურამ ბაჩალიაშვილის მამა დაზარალებულად ცნო და საქმის გამოძიებას თვითმკვლელობამდე მიყვანის მუხლი დაუმატა. გამოძიება, ამ ეტაპზე, საქართველოს სისხლის სამართლის კოდექსის 143-ე მუხლის პირველი ნაწილითა და 115-ე მუხლის პირველი ნაწილით მიმდინარეობს.
