ვემსახურები დასავლეთს, მაგრამ პერიოდულად ვიღებ დანას ზურგში, მათ შორის, კელი დეგნანისგან - ნიკა გვარამია უცნობ დეტალებს ასაჯაროვებს
გამოქვეყნდა:
"მთავარი არხის" გენერალური დირექტორი ნიკა გვარამია გადაცემაში "მთავარი შაბათს" ამბობს, რომ ის დასავლეთს ემსახურება, მაგრამ პერიოდულად იღებს დანას ზურგში დასავლეთის ქვეყნების ზოგი წარმომადგენლისგან. ამ წარმომადგენლებს შორის ერთერთი, ვინც ნიკა გვარამიამ დაასახელა, საქართველოში აშშ-ის ელჩი კელი დეგნანია.
საქართველოს მოსახლეობის უმრავლესობა მიიჩნევს, რომ ეს პარლამენტი არის უკანონო. აი, კელი დეგნანი იქ რომ იჯდა, ჩემი აზრით, სრულიად მძიმე შეცდომის დამშვები კელი დეგნანი, მისმა სამშობლომ, რომლის ხაზსაც უნდა ატარებდეს აქ, მიულოცა ქართულ ოცნებას ხელისუფლებაში მოსვლა? არა! აბა ვისი მანდატით იჯდა კელი დეგნანი იქ? მე არავის დაცვა არ მჭირდება, არავის არ სჭირდება ნაჩუქარი თავისუფლება, ჩვენ გვჭირდება ელჩებისგან სიმართლე პოლიტიკურ დევნაზე და პოლიტპატიმრებზე. მე არ მახსოვს ამ ორი ელჩისგან ჩემი და ჩემი ოჯახის დევნაზე საჯარო განცხადებები, - ამბობს ნიკა გვარამია, რომელიც მეორე ელჩში საქართველოში ევროკავშირის წარმომადგენლობის ელჩს კარლ ჰარცელს გულისხმობს.
ამავე დროს, ნიკა გვარამიამ გაიხსენა აშშ-ის ელჩის მოადგილესთან მისი საუბრის აქამდე უცნობი დეტალები, სადაც დიპლომატმა გიორგი რურუა "შეიარაღებული ბანდის მეთაურად" მოიხსენია.
დიახ, მე პერიდულად ვიღებ ზურგში დანას, იმის მიუხედავად, რომ ვემსახურები დასავლეთს. დანას ვიღებ ზურგში, მაგალითად, სტრასბურგის სასამართლოსგან, ვიღებ დანას იგივე კელი დეგნანისგან, რომლის მოადგილე გიორგი რურუასთან დაკავშირებით მეუბნება, რომ მისი პატიმრობა კი არ არის სირცხვილი, არამედ ის, რომ რურუა ჩემი ტვ-ს ერთერთი დამფუძნებელია, რადგან ის, თურმე, არის “შეიარაღებული ბანდის მეთაური” - ამ დეტალებზე ღიად ახლა პირველად ვსაუბრობ, - თქვა ნიკა გვარამიამ "მთავარი არხის" ეთერში, გადაცემაში "მთავარი შაბათს".
მისივე თქმით, ეს ხელისუფლება მალე შეიცვლება და ელჩებს ბოდიშის მოხდა მოუწევთ ქართველი ხალხის წინაშე.
შეგახსენებთ, ნიკა გვარამიამ დღეს განაცხადა ასევე, რომ ელჩების კეთილი სურვილი ესმის, მაგრამ "ოცნებამ" ისინი ტყვეთა ბაზრის ბროკერებად აქცია, ასევე, განაცხადა, რომ აშშ-ს საელჩოდან საგრანტო დაფინანსებებზე უარი მისდის ბზიშვილის ხელმოწერით.
ნიკა გვარამიამ, ასევე, განაცხადა, რომ არ აპირებს, ვინმეს ხელისუფლებიდან აპატიოს მისი შვილების ფსიქიკის მიყვანა უმძიმეს პრობლემებამდე.
