"ქართული ოცნება" 12 ივლისს, უზენაესში 6 მოსამართლის უვადოდ გამწესების შემდეგ საერთაშორისო კრიტიკას, კერძოდ კი აშშ-ს სახელმწიფო დეპარტამენტის მდივნის, ენტონი ბლინკენის განცხადებას პასუხობს და ისევ ამტკიცებს, რომ 19 აპრილის შეთანხმება "ზედმიწევნით შეასრულეს".
"ზედმიწევნით შესრულდა პოლიტიკური შეთანხმების ყველა პირობა: ხელისუფლებამ „თავი შეიკავა“ უზენაესი სასამართლოს მოსამართლეების ძველი წესების შესაბამისად განწესებისგან; საერთაშორისო პარტნიორებთან შეჯერებული რეკომენდაციის შესაბამისად, იუსტიციის უმაღლესმა საბჭომ „დააპაუზა“ გასაუბრების პროცესი; პარლამენტმა მიიღო კანონი, რომელიც ზედმიწევნით ასახავს ვენეციის კომისიის სამივე საკვანძო რეკომენდაციას; ახალმა კანონმა დამატებით კანდიდატებსაც მისცა განაცხადების შეტანისა და შერჩევის პროცესში მონაწილეობის შესაძლებლობა", - წერია განცხადებაში.
გარდა ამისა, "ოცნება" ამბობს, რომ ზედმიწევნით გაითვალისწინეს ვენეციის კომისიის 2019 წლის რეკომენდაცია, რომლის თანახმად უზენაესი სასამართლოს მოსამართლეების ერთი ნახევარი მეცხრე, ხოლო მეორე ნახევარი - მეათე მოწვევის პარლამენტის მიერ უნდა არჩეულიყო.
პარტია აცხადებს, რომ გუნდის თითოეული წევრისთვის "გასაკვირი და შემაშფოთებელია" განცხადებები და შეფასებები, რომლებიც უზენაესი სასამართლოს მოსამართლეების არჩევასთან დაკავშირებით ვრცელდება.
ამავე თემაზე:
