თუ ამ შეთანხმებას მივაღწევთ, უკრაინას შეეძლება დააფიქსიროს თავისი დღევანდელი სტატუსი როგორც ბირთვული იარაღის არ მქონე - სრულიად ნეიტრალური ქვეყანა - აცხადებს უკრაინის დელეგაციის წევრი, ოლექსანდრ ჩალი უკრაინის უსაფრთხოების გარანტიებზე საუბრისას.
ის ასევე განმარტავს, რა ვალდებულებები ექნებათ გარანტორ ქვეყნებს, შეთანხმების მიღწევის შემთხვევაში:
"უსაფრთხოების ახალი გარანტიები ომის მოგვარებისთვის მნიშვნელოვანი დიპლომატიური გამოსავალია. ეს არის შესაძლებლობა დიპლომატიური გზებით უკრაინის ტერიტორიული მთლიანობა და უსაფრთხოება აღდგეს. ეს არის ახალი იურიდიულად გამყარებული უსაფრთხოების გარანტიები, რომელიც ფორმითა და შემადგენლობით ნატოს მეხუთე მუხლის ანალოგიური იქნება. თუ უკრაინა ნებისმიერი სახის აგრესიის, ან სამხედრო თავდასხმის ობიექტი გახდება, უფლება გვაქვს სამდღიანი კონსულტაციები გავმართოთ.
თუ ეს კონსულტაციები პრობლემას დიპლომატიური გზებით ვერ მოაგვარებს, გარანტორი ქვეყნები ვალდებულები იქნებიან უკრაინას როგორც სამხედრო ძალებითა და შეიარაღებით დაეხმარონ და თუ აუცილებელი გახდება, უკრაინის ცაც კი ჩაკეტონ. ეს არის ჩვენ მთავარი პოზიცია. თუ ამ შეთანხმებას მივაღწევთ, უკრაინას შეეძლება დააფიქსიროს თავისი დღევანდელი სტატუსი როგორც ბირთვული იარაღის არ მქონე - სრულიად ნეიტრალური ქვეყანა. ეს ისტორიულად უკვე დაფიქსირებულია ჩვენს მიერ 1990 წლის 16 ივლისს მიღებულ სუვერენიტეტის დეკლარაციაში. გარანტიების მიღების შემთხვევაში უკრაინის ტერიტორიაზე არ განთავსდება სხვა ქვეყნის სამხედრო ბაზები, არც სამხედრო კონტინგენტი და სამხედრო პოლიტიკურ ალიანსებში არ გავწევრიანდებით. ამასთან ჩვენ ქვეყანაში ჩატარებულ სამხედრო წვრთნებში მონაწილეობის მიღების უფლება მხოლოდ გარანტორ ქვეყნებს ექნებათ. თუმცა პრინციპულად მნიშვნელოვანია რომ შეთანხმების თანახმად, რაც ჩვენთვის მთავარია რომ უკრაინას ევროკავშირში გაწევრიანების უფლება ექნება და გარანტორი ქვეყნები ამაში დახმარებას გაგვიწევენ." ამბობს უკრაინის დელეგაციის წევრი, ოლექსანდრ ჩალი.
იხილეთ ასევე:
