უკრაინამ გააძლიერა მოწოდებები რუსეთის შიგნით სამხედრო ობიექტებზე დასავლეთის მიერ მიწოდებული იარაღის გამოყენების ნებართვის მიღებაზე. ბრიუსელში ევროკავშირის კოლეგებთან შეხვედრის წინ, უკრაინის საგარეო საქმეთა მინისტრმა დმიტრო კულებამ განაცხადა, რომ ევროპის გრძელვადიანი უსაფრთხოება დაიწყო "უკრაინისთვის მოკლევადიანი თამამი გადაწყვეტილებებით". ევროკავშირის საგარეო საქმეთა მინისტრები არაფორმალურ შეხვედრას მართავენ, განხილვის ძირითადი თემები იქნება უკრაინის სამხედრო მხარდაჭერის გაძლიერება და მისი ევროკავშირში გაწევრიანების ხელშეწყობა.
უკრაინას სურდა დასავლური იარაღის გამოყენების ნებართვა რუსეთის სიღრმეში "ლეგიტიმური სამხედრო მიზნეებზე" დარტყმისთვის, კულებას თქმით, ძირითადად აეროდრომებზე, რომლებიც გამოიყენება ბომბდამშენების გასაშვებად.
"თუ ჩვენ მოგვაწოდებენ რაკეტების საკმარის რაოდენობას, თუ დარტყმის უფლებას მოგვცემენ, ჩვენ მნიშვნელოვნად შევამცირებთ რუსეთის შესაძლებლობებს ზიანი მიაყენოს ჩვენს კრიტიკულ ინფრასტრუქტურას და გავაუმჯობესებთ სიტუაციას ჩვენი ძალებისთვის ადგილზე", - თქვა კულებამ.
მას მხარი დაუჭირა საგარეო პოლიტიკის საკითხებში ევროკავშირის უმაღლესმა წარმომადგენელმა ჯოზეფ ბორელმა, რომელმაც კულებას შეხვედრა ევროკავშირის წევრი ქვეყნების 27 საგარეო საქმეთა მინისტრთან შეაფასა, როგორც "მნიშვნელოვანი მომენტი იმისათვის, რომ ყველამ გაიგოს, რატომ" უნდა მოიხსნას შეზღუდვები.
ბორელის თქმით, შეზღუდვები უნდა მოიხსნას რათა უკრაინელებმა მიზანში ამოიღონ წერტილები, საიდანაც რუსეთი მათ ბომბავს, წინააღმდეგ შემთხვევაში, იარაღი უსარგებლოა.
