ენმ-ის ინფორმაციით, ირაკლი ეძგვერაძეს ხვალ გამოკითხავენ. პარტიის ინფორმაციით, 6 სექტემბერს, 10:30 საათზე, ზაჰესის წინასწარი დაკავების იზოლატორში, სპეციალური საგამოძიებო სამსახურის გამომძიებელი შევა. გამოკითხვას დაესწრება "ერთიანობა ნაციონალური მოძრაობის" ადვოკატი ლაშა ტყეშელაძეც.
შეგახსენებთ, ენმ-ის თბილისის საკრებულოს დეპუტატი ირაკლი ეძგვერაძე გასულ ღამეს დააკავეს. მას ადმინისტრაციულ სამართალდარღვევას - კერძოდ კი წვრილმან ხულიგნობასა და პოლიციის კანონიერი მოთხოვნისადმი დაუმორჩილებლობას ედავებიან. დაპირისპირება ოპოზიციონერი დეპუტატის სახლთან, გლდანში მოხდა. პოლიციის მხრიდან აგრესია მას შემდეგ დაიწყო, რაც ნაციონალური მოძრაობის წევრი შეეცადა გაერკვია რატომ იყვნენ მობილიზებული ძალოვნები მის ავტოფარეხთან. შსს -ის ინფორმაციით, პოლიცია ნარკოდანაშაულთან დაკავშირებით საგამოძიებო მოქმედებას ასრულებდა, რასაც ეძგვერაძე ხელს უშლიდა.
ეძგვერაძესთან ერთად დააკავეს ნაციონალური მოძრაობის კიდევ ერთი დეპუტატი საკრებულოში - ირაკლი ნადირაძე, რომელიც რამდენიმე საათში ხელწერილის საფუძველზე გაათავისუფლეს.
როგორც ადვოკატი აცხადებს, ეძგვერაძე ნაცემია და სხეულზე დაზიანებები ეტყობა. უფლებადამცველი მოითხოვს, პოლიციელების მხრიდან შესაძლო ძალადობაზე სპეციალურმა საგამოძიებო სამსახურმა გამოძიება დაიწყოს.
იხილეთ ასევე:
