მის დონეზე ვერ დავალ - ფეხბურთის ფედერაციის პრეზიდენტი კობიაშვილი ნიკა მელიას პასუხობს

ლევან კობიაშვილი ნიკა მელიას ბრალდებებს ცილისწამებას უწოდებს. სფფ-ს პრეზიდენტი და გლდანის მაჟორიტარობის კანდიდატი მელიას იმ განცხადებებს ეხმაურება, სადაც ოპოზიციის ლიდერი მასა და მის მეგობარს, თბილისის მერ კახა კალაძეს,  გლდანის საარჩევნო შტაბის გადაწვის ორგანზატორად ასასხელებს.

ლევან კობიაშვილი წერს, რომ მელია და მისი პარტია წარსულში ჩარჩა დროს ფეხი ვერ აუწყო და "მის დონემდე" ვერ დავა.

არჩევნების დღიდან მოყოლებული, არ მინდოდა ჩემი ოპონენტის ბრალდებებზე კომენტარის გაკეთება. ვთვლიდი, რომ არეულობის ინსცენირება და დრამების დადგმა უბნებთან მათი ჩვეული საარჩევნო სტრატეგია იყო და ჩვენგან ყველაზე სწორი რეაქცია ამ სპექტაკლების იგნორირება იქნებოდა.  
მაგრამ, როგორც ჩანს, ამ  სიბინძურის  დასრულებას არ აპირებს მაჟორიტარი დეპუტატობის კანდიდატი ნიკანორ მელია.
ახლა, როცა ვანდალიზმს და სისხლის სამართლის დანაშაულს გვაბრალებენ, უპასუხოდ ვერ დავტოვებ კანდიდატი მელიას ცილისწამებას.  
ის ბრძოლის მეთოდები, რაც  ამ პარტიას მისი არსებობის მანძილზე, 2003 წლიდან მოყოლებული ჰქონდა, არ შეცვლილა.
მათ ვერ აუწყეს ფეხი ვერც დროს, ვერც ახალ პოლიტიკურ რეალობას და ვერც ამომრჩეველს.  
მე არ მჩვევია მელიას სტილში ყაყანი და ბრალდებების უმისამართოდ ფრქვევა.
მის  დონეზე არ და ვერ დავალ!
დარწმუნებული ვარ, სამართალდამცავი უწყებებები აუცილებლად დაადგენენ, თუ ვის ინტერესებში შედიოდა, რატომ და ვინ გააჩინა ხანძარი ნიკანორ მელიას ერთ-ერთ ოფისში და ყველა დამნაშავე უმკაცრესად აგებს პასუხს კანონის წინაშე.
კანდიდატმა მელიამ კი უნდა დაასაბუთოს,  რის  საფუძველზე  გვდებს ბრალს ოფისის დარბევაში და კრიმინალთან კავშირში, ან მოუწევს  ცილისწამებაზე  ბოდიშის  მოხდა. 
მისგან განსხვავებით, ჩვენ ტელესპექტაკლებს არ ვდგამთ. 
მას შემდეგ, რაც სიმართლე გაირკვევა, მოსახლეობა კიდევ ერთხელ დაინახავს მათ ნამდვილ სახეს და კიდევ ერთხელ გამოჩნდება სად არის სიმართლე და სად ამორალური ტყუილები!" წერს ლევან კობიაშვილი.

შეგახსენებთ, რომ ნიკა მელიამ, მისი შტაბის გადაწვაში მონაწილე პირების გვარები დაასახელა. მელიას ინფორმაციით, კალაძე-კობიაშვილის დავალებით, ე.წ. კრიმინალური ავტორიტეტები ძმები შუკაკიძეები და მათი დაჯგუფება მოქმედებს. განცხადება ოპოზიციის ლიდერმა პირდაპირ ეთერში გააკეთა.

ნიკა მელიას რამდენიმე საათში უპასუხა კახა კალაძემაც და მის განცხადებებს "სამარცხვინო" უწოდა. 

აქვე შეგახსენებთ, რომ ფეხბურთის ფედერაციის პრეზიდენტს მაკედონიასთან წაგებული ისტორიული თამაშის შესახებ, ისევე როგორც, სახელისუფლებო წარმომადგენლების მატჩზე დასწრებაზე,  ფეისბუქზე არაფერი დაუწერია.  თუმცა, მისგან განსახვავებით კომენტარებზე უარი არ უთქვამს მერ კალაძეს.