ვაშინგტონში, სამი კვირის წინ კაპიტოლიუმის ბორცვზე შეტევაში მონაწილეობის გამო, მასობრივი არეულობის ორგანიზებისა და მასში მონაწილეობის მუხლით ბრალი უკვე 150-ზე მეტ ადამიანს წარედგინა, ზოგადად კი, გამოძიება 400-ზე მეტი მოქალაქის წინააღმდეგ მიმდინარეობს, - ამის შესახებ CNN იტყობინება.
შეტევის მონაწილეებს სხვადასხვა ბრალდება აქვთ წარდგენილი, მათ შორის ხულიგნობა, უკანონო შეღწევა, სხვისი საკუთრების ხელყოფა-ძარცვა, სამართალდამცავი ორგანოების წარმომადგენლებზე თავდასხმა. ზოგიერთ მათგანს, ვისაც ბრალს წარუდგენენ, 20 წლამდე ციხე ემუქრება.
შეგახსენებთ, 6 იანვარს პრეზიდენტ დონალდ ტრამპს მომხრეებმა კაპიტოლიუმის ბორცვზე შეტევა მიიტანეს. არეულობის დროს, მინიმუმ, ხუთი ადამიანი დაიღუპა.
ამ არეულობის გამო, კონგრესი იძულებული გახდა, შეეწყვიტა სხდომა, სადაც საპრეზიდენტო არჩევნებში ჯო ბაიდენის გამარჯვება ოფიციალურად უნდა დაემტკიცებინა, თუმცა, სხდომა მოგვიანებით მაინც განახლდა და ჯო ბაიდენი აშშ-ის არჩეულ პრეზიდენტად გამოცხადდა.
წარმომადგენელთა პალატამ, დონალდ ტრამპს, არეულობის წაქეზებისთვის, იმპიჩმენტი გამოუცხადა და რეზოლუცია განსახილველად სენატს გადასცა.
აქვე გაგახსენებთ აშშ-ის მოვლენებს თანმიმდევრობით:
- დონალდ ტრამპის მხარდამჭერები კაპიტოლიუმში შეიჭრნენ - არეულობა აშშ-ში
- კაპიტოლიუმი დღეს - ფოტოებში
- ჩვენ მოგვპარეს არჩევნები, მაგრამ ახლა ყველა უნდა წავიდეთ სახლში - ტრამპის მიმართვა მხარდამჭერებს
- ამერიკული დემოკრატია უპრეცედენტო შეტევის ქვეშაა - ბაიდენი
- კონგრესმა ამერიკის არჩევნებში ჯო ბაიდენის გამარჯვება ოფიციალურად გააფორმა
- FBI-მ კაპიტოლიუმის მოვლენებზე გამოძიება დაიწყო
