ევროპარლამენტარი რაფაელ გლუკსმანი, საქართველოს მესამე პრეზიდენტის მიმართ პრემიერმინისტრის მუქარას გამოეხმაურა და აღნიშნა, რომ "მუხლების დამატებაზე" გაკეთებული განცხადებით, ირაკლი ღარიბაშვილმა მიხეილ სააკაშვილის საქმის პოლიტიკურობა დაადასტურა.
გლუკსმანის თქმით, გაუგებარია რომელ დემოკრატიულ ქვეყანაში წყვეტს პრემიერი, ვის რამდენი ბრალი წაუყენონ და ვინ რამდენი ხანი გაატაროს საპატიმროში.
"არ აქვს მნიშვნელობა ვინ რას ფიქრობს სააკაშვილზე, მთავარი ისაა, რომ საქართველოს მართლმსაჯულება არ არის დამოუკიდებელი და ეს არის პოლიტიკური საქმე. ეს ყველამ იცის და პრემიერმინისტრმა ღარიბაშვილმა საკუთარი პირით თქვა, რომ თუ სააკაშვილი კარგად მოიქცევა ციხეში, ანუ პოლიტიკურ განცხადებებს არ გააკეთებს მაშინ მას დამატებით მუხლებს არ წაუყენებენ, და თუ ცუდად მოიქცევა, ანუ კიდევ გააკეთებს პოლიტიკურ განცხადებებს, მაშინ მეტ დროს გაატარებს ციხეში. რას ნიშნავს ეს?! რომელ დემორკატიულ ქვეყანაში წყვეტს პრემიერმინისტრი ვის რამდენი ბრალი უნდა წაუყენონ და ვინ რამდენი ხანი უნდა გაატაროს საპატიმროში, ასე რომ, თუ აქამდე ამაში ვინმეს ეჭვი ეპარებოდა, ახლა ღარიბაშვილმა თავად აღირა ყველაფარი, მან ხელი მოაწერა, რომ ეს არის პოლიტიკური საქმე", - თქვა გლუკსმანმა.
პრემიერმინისტრი ციხეში მყოფ მესამე პრეზიდენტს 3 ოქტომბერს დაემუქრა და თქვა, რომ თუ ის ციხეში "წესიერად არ მოიქცეოდა" მუხლებს დაუმატებდნენ. მოგვიანებით ღარიბაშვილმა მუქარა უარყო და თქვა, რომ მისი კომენტარი მედიამ "არასწორი ინტერპრეტაციით" გაავრცელა.
ცნობისთვის, გუშინ, საქართველოს მესამე პრეზიდენტის, მიხეილ სააკაშვილის პატიმრობასთან დაკავშირებით, ევროპარლამენტარებმა საერთო წერილი გაავრცელეს, რომელშიც ნათქვამია, რომ მიხეილ სააკაშვილის პატიმრობა იქამდე უნდა შეწყდეს, სანამ ის სამართლიანი სასამართლოს წინაშე არ წარსდგება. ამავე თემაზე:
- "თავისუფლება მიშას ნიშნავს - თავისუფლება საქართველოს" - ევროპარლამენტარი გლუკსმანი;
- შეიძლება, ინდივიდუალურ სანქციებზეც დაიწყოს საუბარი - ანა ფოტიგა მიხეილ სააკაშვილის პატიმრობაზე
- ველით, რომ ყველაფერი კანონის უზენაესობის ფარგლებში წარიმართება - კალიურანდი მიხეილ სააკაშვილზე
