ჩვენთან ერთად მოიპოვეთ თავისუფლება!
მაგნიტსკის სიის ქართულ ანალოგში იუსტიციის მინისტრი, რატი ბრეგაძეც მოხვდება - ინფორმაცია ოფიციალურად დაადასტურა მიხეილ სააკაშვილის ადვოკატმა, შალვა ხაჭაპურიძემ. მან ცოტა ხნის წინ დატოვა "ვივა მედის" კლინიკა, სადაც მესამე პრეზიდენტთან იმყოფებოდა. ხაჭაპურიძის თქმითვე, სიაში 20-მდე პირი შევა, რომლებიც უშუალოდ აღასრულებდნენ უკანონობას მესამე პრეზიდენტის მიმართ. მათ შორის იქნებიან მოსამართლეები, პროკურორები და გორის სამხედრო ჰოსპიტლის სამედიცინო პერსონალი - ექიმები და ექთნები. ხაჭაპურიძეს ამ ეტაპზე კონკრეტული გვარები არ დაუსახელებია, თუმცა აღნიშნა, რომ სია და შესაბამისი დოკუმენტაცია 2-3 დღეში გადაეგზავნება აშშ-ს კონგრესს.
შალვა ხაჭაპურიძემ დღეს ამ საკითხთან დაკავშირებით შეხვედრები პარლამენტში, ხატია დეკანოიძესთან და უკრაინის საელჩოში, ანდრეი კასიანოვთან გამართა.
შეგახსენებთ, საქართველოს მესამე პრეზიდენტმა მიხეილ სააკაშვილმა "მაგნიტსკის სიის" ავტორს, ბილ ბროუდერს 8 იანვარს მიმართა და სთხოვა, რომ ქართველ პოლიტიკოსებს მაგნიტსკის ახალი სიის შედგენაში დახმარებოდა. სააკაშვილს ბროუდერმა მალევე უპასუხა - მომაწოდეთ დოკუმენტები მოწამვლასა და წამებაზე, ყველაფერს გავაკეთებ, რომ დასავლეთმა მაგნიტსკის სანქციებისთვის ამას ყურადღება მიაქციოს - აღნიშნავდა ბროუდერი.
